Edizioni Cuecm - Libreria universitaria - Libri Università di Catania

torna alla home page

il tuo carrello

COMME NASCETTE NAPULE

Poesie

Raffaele Pisani

Anno: 2011
Pagine: 68
Prezzo: € 10,00
ISBN: 9788866000099
Codice catalogo: 537

[+] acquista

Comme nascette Napule

’Na dummeneca, ’o Signore,

’n Paraviso se scetaie

cchiù matina ’e ll’ati iuorne,

e da ’o lietto se menaie

comme a cchi, mpruvvisamente,

s’arricorda c’ha dda fa’

’na facenna assaie mpurtante

e, che vuo’, s’ ’a va a scurdà.

Comm’infatte, smanïuso

chiamma a n’angelo: – Guagliò,

truove subbeto a San Pietro

ca me serve primma ’e mo! –

E San Pietro s’appresenta:

– Comandate, o mio Signore! –

– Ueh! San Pié, sienteme buono

ca m’he’ ’a fa’ nu gran favore:

io, distratto ’a tutte ’e mpicce

ca me dà ogni ghiuorno ’a Terra

– chi s’appicceca, chi strilla,

chi se nquarta, chi vo’ ’a guerra…

che oggi è il nome di Maria

mi è scappato dalla testa,

e mmo, intanto, Essa s’aspetta

il regalo per la festa.

E cuntinua: Pe’ furtuna

ca m’ ’o vvaco a ricurdà

mentre sto tra veglia e suonno:

’a stanchezza che te fa!

E ce pienze che figura

ch’io facevo? Arrassusia!

E po’ proprio cu ’a Madonna

’sta mancanza ’e cortesia? –

E San Pietro se sentette

tutta quanta ’a chiacchiariata,

po’ dicette: – Patre caro,

ccà ’a facenna è delicata! –

– Delicata? Ah, figliu mio!

– rispunnette ’o Pat’Eterno –

chesta piezza ’e ciucciaria

è passibbele ’e ll’Inferno! –

– E va buo’, mo esagerate,

– le fa ’o Santo – un regalino

certamente troverete

in qualunque magazzino. –

– No, San Pie’, – risponne Dio –

’a Madonna va truvanno

nu regalo eccezionale.

Saie che cosa va cercanno?

Ch’io le faccio ncopp’ ’a terra

nu paese accussì bello

c’ha dda essere p’ ’a gente

un autentico gioiello!

E pirciò, damme ’na mano,

damme tu quacche cunziglio,

ca sto stanco, troppo stanco

p’apparà chistu scunciglio. –

E San Pietro le risponne:

– Mo l’azzardo nu parere,

spero solo di potervi

fare overo un bel piacere:

vuie sceglite a gusto vuosto

’o cchiù bello ’e tutte ’e site

ca ce stanno ’n Paraviso,

doppo scelto, m’avvertite

ca m’ ’o piglio e ’o scengo lesto

ncopp’ ’a terra. In un momento

sistimate tutte cose

e restate assaie cuntento! –

Cumpiaciuto, Dio le dice:

– Santu Pie’, si’ nu cannone!

Ja’, mettimmoce ’n cammino

e facimmo ’e ccose bone! –

E a ll’istante, ’o Pat’Eterno,

piglia e a ll’opera se mette:

coglie ràppule ’e viole,

ienche ’e rose doie carrette,

po’ appripara nu canisto

’e curalle, ragge ’e sole,

nu pezzullo ’e cielo azzurro,

passarielle, rusignuole,

e ’na luna ’argiento e latte,

e nu mare ’o cchiù turchino,

e ’e canzone e tarantelle

nu cascione è chino chino;

llà ppe’ llà fa ’na riviera

cu nu giro ’e perle ’n pietto

e ce pitta, ardente e bello,

’o Vesuvio derimpetto.

Sceglie, ’nzomma, ’e mmeglie cose,

nun abbada a prezzo e a spese,

e ce mette tutto ’o genio

pe’ fa’ bello stu paese.

Po’, assettannose: – San Pie’,

cca’ sta tutto l’occorrente:

parte e fa’ ’na cosa bona,

cu’ passione e sentimente! –

E San Pietro, tanno tanno,

scenne ’n terra: dudice ore

e fa ’a capa custruzione:

nu paese tutto ammore.

’A Madonna, ca guardava,

rummanette ’ndusiasmata,

e da ’o Cielo le mannaie

’na carezza appassiunata.

E che festa ’n Paraviso!

Ch’allerezza int’ ’a nuttata!

Benedetta d’ ’a Madonna,

’n terra, Napule era nata.

Che peccato ca po’ Dio

dette tutto mmocch’ ’e cane

affidanno stu tesoro

proprio a nuie napulitane!